Sapsapulenka, Leonora, iti kalbit dagiti darikmat nga aglabas
Iti ikut dagiti naunday a kalsada ti Jersey City a nakaitangkalak
Iti sab-ok dagiti rabii a panagmaymaysak
Iti siled a pagturogak kanayon nga agam-ammangawak
A mangbukbukel ta pintas ken libnosmo a nagpaiduma!
O, Ayatko, sadino ita ti pangsapulak kenka?
Ta mamatika koma a nupay immadayoak dita sidongmo
Lagipko, Leonora, saanto a pulos mapukaw
Ta tunggal aglabas a darikmat ad-adda a bumegbeggang
Ti panagayatko kenka a dinto pulos agbaaw
Ngem, Leonora, awankan nga innak masapulan…
Ngem saanak nga agsardeng a mangsapsapul kenka
iti ikut dagiti sumangbay a parbangon…
Iti nginabras dagiti daniw a putarek
Wen, Leonora, sapsapulenka… sapsapulenka a kanayon…
Cristino Iloreta Inay
644 Newark Avenue
Jersey City, New Jersey 07306
U.S.A.
